جمالك مع نانيس : وصفات طبيعية لكل بشرة دهنية

إزاي تتعرفي عليها؟
في اختبار ممكن أي بنت وهي قاعدة في البيت تعمله علشان تعرف إذا كانت بشرتها دهنية أم لا، وهي إنها تجيب كلينكس "منديل ورق" وتحطه على بشرتها لمدة خمس دقائق، لو لقيت إن المنديل فيه زي بقع دهنية يبقى كده بشرتها دهنية..
كمان تقدري تتعرفي عليها من خلال مظهرها العام، فلو بصيتي في المرايا هتلاقيها بتلمع، وممكن تلاقي فيها شوائب بعد 3 أو 4 دقائق من التنظيف... وممكن تلاقي دهون على الجبين والذقن والأنف "منطقة التيزون"، بالإضافة إلى أن المسام المفتوحة بتبقى في الأنف وكمان في الخد... كمان البشرة الدهنية بتتميز بظهور حبوب على الخد والذقن والجبين بشكل مفاجئ
.
إزاي تهتمي بيها؟
البشرة الدهنية محتاجة إلى عناية من نوع خاص، وده عن طريق تنظيفها كل يوم 3 مرات على الأقل بصابون طبي زي "ديتول" أو صابونة "كبريت"، ويُفضّل إنك قبل ما تنامي تغسليها بماء ساخن، وتجففيها كويس بس خلي بالك إنك تجففيها براحة جداً، وبلاش تستعملي كريمات مرطبة بتحتوي على نسبة عالية من الدهون؛ لأن الكريمات دي بتساعد على زيادة الحبوب، ويا ريت تستخدمي ماسكات طبيعية علشان تتخلصي من أي مشاكل ممكن إنها تظهر في بشرتك، ومن ضمن الماسكات اللي ممكن إنك تعمليها في البيت..
 غسول النعاع الأخضر
ده غسول مفيد جداً للبشرة الدهنية بيساعد على تخليصها من الحبوب اللي ممكن إنها تظهر فجأة...
المكوّنات:
 ورق نعناع أخضر
 عصير برتقال
 عصير ليمون
 عصير خيار
• ماء الكرنب.. "وده بتحضريه بإنك بتسلقي الكرنب في شوية ميه، وتاخدي الميه دي وتستعمليها في الماسك".
الطريقة:
اغلي ورق النعناع في لتر ماء، وبعد كده ضيفي إليه عصير البرتقال وعصير الليمون وعصير الخيار وماء الكرنب... واغسلي بشرتك بالغسول ده كل يوم بعد ما تاخدي حمامك اليومي، وبعد مرور 3 أو 4 دقائق من استخدامه تشطفي بشرتك بالماء الفاتر.
 ماسك الخميرة لشد البشرة الدهنية
ده ماسك حلو أوي بيعمل على شد البشرة الدهنية، ومكوّناته بسيطة جدا وهتلاقيها عندك في البيت...
المكونات:
 2 معلقة كبيرة خميرة بيرة
 2 معلقة كبيرة لبن فاتر
 1 معلقة كبيرة زيت لوز حلو "متوفر عند العطار"
الطريقة:
اخلطي كل المكوّنات دي مع بعضها، وبعد كده افردي الماسك على بشرتك، وسيبيه لمدة 10 دقائق، وبعد كده اشطفي بشرتك بالماء الفاتر، ممكن إنك تعملي الماسك مرتين في الأسبوع.
 ماسك الصلصال للمسام الواسعة
دايما أصحاب المسام المفتوحة بيعانوا من مشكلة المسام الواسعة، بس بعد ما يستخدموا الماسك ده هيتخلصوا من المشكلة دي نهائياً...
المكونات:
 معلقة كبيرة صلصال أبيض "متوفر عند العطار"
 معلقة كبيرة ماء زهر
 عصير برتقال
 1/2 معلقة زيت بندق
الطريقة:
اخلطي كل المكوّنات دي مع بعضها، وبعد كده وزعي الخليط على بشرتك وسيبيه عليها لمدة 10 دقائق، وبعد كده اشطفي بشرتك بالماء الفاتر ثم البارد، استخدمي الماسك ده مرة كل أسبوع وهتشوفي الفرق بنفسك.
 تونيك ماء الورد
التونيك ده من الحاجات المهمة أوي للبشرة الدهنية؛ لأنه بيخلصها من الشوائب والملوّثات اللي ممكن إنها تتعرض لها أثناء اليوم نتيجة التلوث، وكمان بيخلصها من الدهون الزائدة؛ لأنه بيساعد على قفل مسام الوجه، وعلى فكرة التونيك ده مش هيكلّفك حاجة خالص كل الحكاية إنك حتجيبي زجاجة ماء ورد "متوفرة عند العطار" وتستخدميها كتونيك طبيعي للبشرة.
وفي النهاية أحب أقول لك إنك لازم تهتمي بتنظيف الفرش والبدارات والاسفنجات الخاصة بالماكياج يومياً أو يوم بعد يوم بالميه والصابون وتسيبيها تنشف كويس.. وده علشان تحمي نفسها من ظهور الحبوب المفاجئة؛ لأن في أوقات كتير أوي بيكون سبب ظهور الحبوب في البشرة الدهنية نتيجة إلى تلوث أدوات الماكياج.

عن Asmaa Nabil

اسماء نبيل مصممة جرافيك وكاتبة في مجال الموضة و الازياء لها عدة مدونات تهتم بالمراْة العصرية ولها الكثير من اعمال التصميم باستخدام الفوتوشوب

13 تعليقات

  1. thanks i will try them all and advice you

  2. مرسى ليكى بس ياريت تقولوا المعاير بتاعت اول مسك ولا نحطها كده بكميات متسوبه وخلاص

  3. السلام عليكم
    جزاك الله خيرا ما تتصوري فرحتي الآن كنت محتاجة لهيك ماسكات كل هده المشاكل اعاني منها.لكن عندي طلب صغير ممكن تكتبي المكونات بلهجة اخرى أو بالفرنسية ادا ممكن لأنه التسميات تختلف من بلد لآخر.شكررررررررراااا.
    أيمان من الجزائر.

  4. ياريت المكونات بامعيالر مثل عصير البرتقال اى قميه

  5. جميل بس ياريت المكونات تكون بالمقادير ونستعمل الماسك كل اد اية مثلا وميرسى

  6. ممكن اعرف يعنى اة لبن فاتر و هل اضعه بودرة ولأ سائل  و خالى الدسم ولأ لأ وبنسبة لعصير البرتقال طبيعى ولأ موعبء و شكرا" على الا فادة ارجو الرد سريعا"

  7. ميرسي لمجهودك بس ممكن اعرف ايه نوع البودر المناسب للبشرة الدهنية واي نوع ماركة يناسبني لان الموضوع ده تاعبني موت وجبت كذا نوع غالي اوي وبردو عامل زي الجيير في وشي وميرسي

  8. جميل بس ياريت اكتر

  9. اشكرك على مجهودك وياريت تقولى لينا وصفات اكتر

  10. ممكن اعرف خميرةبيرةمعني ايه ارجو الرد سريعا

  11. ممكن تكون وصفات للاسنان الحساسة بليز بسرعة

  12. [quote comment="418"]ميرسي لمجهودك بس ممكن اعرف ايه نوع البودر المناسب للبشرة الدهنية واي نوع ماركة يناسبني لان الموضوع ده تاعبني موت وجبت كذا نوع غالي اوي وبردو عامل زي الجيير في وشي اشكرك

  13. مسكات سهلة ورائعه جداا بس ياريت وصفات لتقشير البشرة الدهنية ومشكورين""

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *