جمالك مع نانيس : وصفات للعناية بالقدمين

كتير منكم بيسألوني عن وصفات طبيعية للعناية بالقدمين خصوصا أننا داخلين على الشتاء، ودايما بنعاني من مشكلة جفاف وتشقق جلد القدمين بس أنا شايفة إن الوقاية أهم من العلاج، علشان كده قبل ما أتكلم عن الوصفات الطبيعة هاتكلم على شوية نصائح هتساعدك على الوقاية من أي مشاكل ممكن إنها تقابلك...
 لازم تهتمي جداً بالنظافة اليومية للقدمين عن طريقة إنك تغسليهم كل يوم بالماء والصابون أكثر من مرة، وعلى فكرة الوضوء خمس مرات في اليوم ممكن إنه يوفي بالغرض ده.
 احرصي على تنشيف القدمين كويس جدا بعد غسلهم خصوصا المنطقة اللي بين الصوابع لعدم نمو الفطريات بين الأصابع.
 حاولي وإنتِ بتختاري الأحذية إنك تختاري الأحذية المريحة لقدمك.
 قللي من ارتداء الأحذية الضيقة والشرابات الثقيلة جداً، وكمان الأحذية المفتوحة زي (الصنادل)؛ لأن كل الحاجات دي بتخلي الرجْل تعرق جامد وكمان بتخلي الأتربة تدخل للقدمين بسهولة.
 ممنوع ارتداء شراب واحد أكثر من 3 أيام حتى ولو كان نظيف، لأنه ممكن يكون فيه عرق مش ظاهر، وده ممكن يسبب رائحة كريهة وكمان ممكن يسبب عدوى فطرية.
 حاولي إنك تختاري الشرابات من الأقمشة الطبيعية زي القطن والصوف والنايلون؛ لأن الأقمشة دي بتساعد على التنفس على عكس الأقمشة المصنوعة من البوليستر.
 امشي دايماً حافية في البيت؛ لأن ده بيفيد الأقدام جداً، وبيقوي العضلات وخصوصاً عضلة الساقين.
 احرصي على تدليك قدميك بحركات دائرية؛ لأن التدليك ده بيريّح الجسم بكامله، ويا ريت إنك تستعملي مقشّرا بشكل منتظم لإزالة الجلد الخشن والميت من منطقة الكعبين.
 يا ريت وأنت في مصيف تستغلي الفرصة وتمشي حافية على الرملة الساخنة لأن الطريقة دي أحسن طريقة لتقوية جلد الكعبين.
ودلوقتي تعالي نشوف مع بعض شوية وصفات طبيعية ممكن إنك تعمليها في البيت بنفسك..
حمام الماء الدافئ لتطرية الجلد
كل اللي عليكِ إنك تحطي رجلك في وعاء فيه ماء دافئ بس بشرط إن المية تغطي الكعبين تماماً، ويا سلام لو ضفتي إلى المية دي بعض الأعشاب زي النعناع والزعتر والورد البلدي أو قطرات من زيت اللافندر "هتلاقيه عند العطار"، وبعد كده تعملي تدليك بأصابع إيديكي للكعبين بداية من الأصابع وحتى نهاية الكعبين..
ولو كنت عايزة تتخلصي من أي جلد ميت موجود يبقى عليكِ وعلى الحجر الصوان اللي بتجيبيه من عند العطار وتفركي بيه جلد الكعبين، وعلى فكرة ده مش بيشيل الجلد الميت وبس ده كمان بيقضي على المناطق الخشنة اللي ممكن إنها تكون موجودة في الكعبيين..
وبعد ما تخلصي ممكن إنك تدهني منطقة الكعبين بزيت عطري طبيعي زي زيت اللافندر أو الزيتون أو البابونج أو تحطي أي كريمات مرطبة خاصة بالكعبين.. وعلى فكرة الحمام ده ممكن تعمليه مرة كل أسبوع.
دهان الفازلين للتغلب عى التشقق
أما لو كنتِ بتشتكي من مشكلة تشقق الكعبين يبقى تتجنبي استعمال الماء الساخن في غسيل القدمين وخليكي في المية الباردة، واستخدمي صابون بيحتوي على مواد طبيعية زي صابونة زيت الزيتون أو الجلسرين؛ لأن الصابون ده بيحتوي على مواد طبيعية بتطري الجلد وبتمنع تشققه.. كمان ممكن إنك تدهني رجليكي بالفازلين الطبي أو الجلسرين كل يوم قبل ما تنامي.

عن Asmaa Nabil

اسماء نبيل مصممة جرافيك وكاتبة في مجال الموضة و الازياء لها عدة مدونات تهتم بالمراْة العصرية ولها الكثير من اعمال التصميم باستخدام الفوتوشوب

21 تعليقات

  1. ميرسى كتيييييييييير

  2. ميرسي على المعلومات الحلوة دي بس انا كنت عايزة اسال ازاي ممكن نتخلص من السواد اللي بيظهر في الركب؟؟ وتحياتي ليكي يا عسل

  3. ميرسي ليكي ياقمر ربنا يخليكي لينا

  4. بارك الله فيك، ممكن أضيف كمان ماء الورد مع ماء النقع تجعل للقدمين رائحة جميلة لفترة أطول

  5. مرسى بس ياريت المزيد

  6. هل هناك طريقة للقضاءعلى انتفاخ أصابع القدمين واحمرارها ؟

  7. حلوة قوى الوصفة دى

  8. thanks alot really great advices

  9. أريد المزيد من الوصفات الطبيعية وياريت تكون للبشرة

  10. شكرا جدا بس انا ايدي خشنه ومش نافع معاها اي ادويه خالص ولا دكتره ممكن تقوليلي نصيحه يريت بسرعه لان زفافي قرب جدا

  11. ياترى في وصفات للعناية بالبشرة الحساسة

  12. ديه طريقة تحفه متشكرة قوووووى

  13. حاجة تحفة وانا عن نفسى هعمل كدة وشكرا على الموضوع
    الموقع دة فعلا هايل

  14. merci ktiiiiiiiirrr 3al lwasafat dollll

  15. بجد هايل وتحفه موت عايزه اسال حد يعرف حل لمشكله رائحه العرق وكيفيه ازالتها من فترهاشهر لاحظت المشكله ومليت
    اقترح لوتعرضو فيديوهات لتعليم الميك اب(الميكياج)
    مرسي

  16. لازالة رائحة العرق ممكن تستخدمى الشبه ودى من عند العطار بعد ما تاخدى الدش حطى شويه من الشبه المطحونه تحت الابط مش هتلاقى ريحة عرق خالص لمدة 3ايام حتى لو اخدتى دش كل يوم وكمان مش بتسد المسام

  17. اولا يا جماعه احب اشكر الاخت اللي كتابه الموضوع ده بجد اكتر من رائع وخصوصا واحنا داخلين علي فترة الشتاء ثانيا احب اايد الاخت رشا فموضوع الشبه ده لانها فعلا مفيده جدا للعرق وانا عن نفسي بستعملها وليها فوايد كتيرة زي انها مش بينتهي مفعولها بسرعه زي المزيلات بالاضافه انها مش بتسبب سد للمسام ولا اسمرار للبشرة ولو عاوزة ريحتها تبقي حلوة حطيها فاي علبه كريم عندك بعد ما تخلص تكون ريحتها جذابه هتمتص الريحه منها وتبقي ريحه الشبه جميله لما تحطيها تحت الابط وكمان هقولكم نصيحه للستات المتزوجون ان الشبه ممكن تستخدم مع ماء دافيء كبدرة تشطيف مهبلي انا عرفت الموضوع ده من والدتي واختي وكمان لو عندكم مشاكل فاسمرار بعض المناطق فالجسم في كريم اسمو لاميزيل مفيد جدا للاسمرار وللبشرة الحساسه خاصه وياريت اكون قدرت افيدكم واللي عندها حاجه متبخلش علينا بيها ولا علي الموقع لانه بجد موقع رائع

  18. بصراحه انتو موقع تحفه وانا مبسوطه اني مشتركة معاكو ياريت تقبلوني معاكو انا عندي مشكلة ياريت اللي تقدر تساعدني تبعتلى انا فرحي انشاءالله بعد شهرين وانا جسمي مليان وعملت رجيم وخسيت5كيلو وانا مليانة من تحت (الارداف)ياريت لو حد يساعدني قبل الفرح علشان اخس شكراااااااااااااااااااااااااااااااااااااااااااااااااااااااااااا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *